Dómur þyngdur yfir fyrrum starfsmanni frístundaheimilis með barnaklám

Hæstiréttur þyngdi í dag dóm yfir íslenskum karlmanni á sjötugsaldri en gróft barnaklám á ljósmynda- og myndbandsformi fannst á tveimur tölvum hans. Var maðurinn dæmdur í tveggja mánaða skilorðsbundið fangelsi en áður hafði Héraðsdómur Reykjavíkur dæmt hann í 30 daga fangelsi á skilorði.

168 ljósmyndir og fimm hreyfimyndir fundust á tveimur tölvum mannsins við húsleit lögreglu í júlí 2012. Sýndu myndirnar börn á kynferðislegan eða klámfenginn hátt. Var lagt hald á tölvurnar sama dag.

Maðurinn, sem hefur ekki komið við sögu lögreglu, játaði brot sitt skýlaust fyrir dómi. Fyrir Hæstarétti dró maðurinn hins vegar játningu sína til baka og hélt því fram að innbrotsþjófar hefðu halað niður hinu ólöglega efni. Þá skýringu mat Hæstiréttur ekki trúverðuga.

Í ljósi þess hve mjög gróft hluti af myndefninu var taldi Hæstiréttur rétt að þyngja dóminn í tveggja mánaða fangelsi skilorðsbundið til tveggja ára.

Húsleit lögreglu var gerð í kjölfar þess að tveir menn brutust inn til mannsins og beittu hann ofbeldi. Maðurinn starfaði á frístundaheimili fyrir börn og unglinga.

Tvímenningarnir bundu hann í stól, hótuðu honum líkamsmeiðingum og lífláti og neyddu hann til að millifæra á þá á fimmta hundrað þúsund. Þeir bundu hann á höndum með rafmagnssnúru ofan í baðkari, tróðu upp í hann tusku og límdu fyrir. Þeir héldu honum nauðugum í íbúðinni í sex klukkustundir og höfðu síðan ýmsar eigur hans á brott með sér.

Dómurinn í heild sinni.