Geðlæknar við störf á tveimur stöðum

Geðlæknar eru aðeins starfandi í Reykjavík, á Seltjarnarnesi og á Akureyri. Þetta kemur fram í úttekt Byggðastofnunar á staðsetningu þjónustu á landinu öllu.

Kristján Þór Júlíusson heilbrigðisráðherra segir umfang geðlækninga á landinu vera mest þar sem flest fólk er, það er á höfuðborgarsvæðinu og á Eyjafjarðarsvæðinu, en síðan minnki þjónustan eftir því sem svæðin séu fámennari. „Það er hins vegar hluti af því sem við kemur sameiningu heilbrigðisstofnana á landsbyggðinni undir sterkari stjórn að geta nýtt sérfræðiþekkingu sem þessa á fleiri stöðum. Með því er hægt að veita betri þjónustu á fámennum svæðum landsins og nýta sérfræðiþekkingu innan heilbrigðisstofnana með hagkvæmari og betri hætti.“

Sigríður Ingibjörg Ingadóttir, formaður velferðarnefndar Alþingis, telur þjónustu geðlækna á landinu verða að færast nær fólkinu og verða hluti af nærþjónustu í heimabyggð. „Í þeirri geðheilbrigðisstefnu sem nú er í mótun er ekki síst verið að horfa til heilsugæslustöðvanna sem lykilstöðva. Þá skiptir miklu máli að heilsugæslan sé í stakk búin til að taka við því og að geðlæknir sé tiltækur. Við þurfum þekkingu á geðheilbrigðismálum inn í heilsugæsluna.“

Samkvæmt Læknafélagi Íslands eru 78 geðlæknar starfandi á landinu. Langflestir þeirra eru starfandi á höfuðborgarsvæðinu. Kristján segir marga geðlækna einnig vinna vítt og breitt um landið þótt þeir séu ekki staðsettir þar allt árið um kring. „Þetta er gert þannig að því er stýrt að einhverju leyti í gegnum heilbrigðisstofnanir á landinu. Á sumum stöðum er samstarf stóru sjúkrahúsanna þannig að það teygir sig yfir á stærra svæði. Einnig eru geðlæknar að starfrækja sína þjónustu á eigin vegum í gegnum Sjúkratryggingar annars staðar á landinu. Það er ljóst að þjónusta geðlækna er langmest á höfuðborgarsvæðinu enda eru flestir íbúar á því svæði landsins.“

Sigríður Ingibjörg telur mikilvægt að allir geti nýtt sér þjónustu geðlækna. „Við verðum að veita heilsugæslunni leiðir til að veita slíka þjónustu. Einstaklingar verða að finna sér leiðir til að leita læknis, þeir veigra sér við að kaupa sér flugfar til Reykjavíkur alla jafna vegna geðrænna vandamála.“