Heildarkostnaður við sameiningu ráðuneyta á síðasta kjörtímabili nam rúmum 437 milljónum króna. Inni í þeirri upphæð er ekki kostnaður sem kom til vegna starfsmanna ríkisins sem fóru á biðlaun þegar ráðuneyti voru sameinuð.
Þetta kemur fram í svari Bjarna Benediktssonar, fjármála- og efnahagsráðherra, við fyrirspurn Þorsteins Sæmundssonar alþingismanns um sparnað af sameiningu ráðuneyta.
Í svarinu, sem birtist á vef Alþingis í fyrradag, er farið yfir þær miklu skipulagsbreytingar sem farið var í á tímabilinu.
„Á síðasta kjörtímabili urðu þannig til þrjú ný ráðuneyti með sameiningu, atvinnuvega- og nýsköpunarráðuneytið, innanríkisráðuneyti og velferðarráðuneyti,“ segir í svarinu. Þar er einnig tekið fram að ýmsar tilfærslur á verkefnum og málaflokkum á milli ráðuneyta hafi leitt til nafnabreytinga á öðrum ráðuneytum.
„Ekki er hægt að greina á milli árangurs af sameiningu ráðuneyta og almennrar hagræðingar sem átti sér stað á tímabilinu.“
Stöðugildum á aðalskrifstofum ráðuneytanna fækkaði úr 504 í maí 2009 í 477 í sama mánuði 2014. Einnig fækkaði þeim skrifstofustjórum ráðuneytanna sem voru án skrifstofu á tímabilinu.- hg
Sameining ráðuneyta kostaði 437 milljónir
