Efnahagslegur stöðugleiki frekar en launahækkanir

Í nýrri könnun sem Capacent gerði fyrir Samtök Atvinnulífsins kemur fram að tveir af hverjum þremur, af þeim sem tóku afstöðu, vilji horfa til þess að viðhalda efnahagslegum stöðugleika í kjarasamningum.

53% þeirra sem svöruðu eru hlynntir samnings milli stéttarfélaga, atvinnurekenda og stjórnvalda þar sem markmiðið sé stöðugt verðlag og gengi krónunnar. Lítil áhersla verði þá á launahækkanir.

Örlítið fleiri telja að lítið eða mjög lítið svigrúm sé til almennra launahækkana. 39% eru á þeirri skoðun en 33% vilja meina að svigrúmið sé mikið eða mjög mikið. Rétt rúmur fjórðungur tekur ekki afstöðu. Ríflega helmingur hefur miklar eða mjög miklar áhyggjur af verðbólgunni.

Könnunin var gerð á tímabilinu 16. október til 3. nóvember 2014 og voru spurningar 10. Í úrtaki voru handahófsvaldir 2.898 einstaklingar, 18 ára og eldri. Af þeim svöruðu 1.733, þannig að svarhlutfall var 56%.