Kaldar kveðjur til þingflokks Sjálfstæðisflokksins

Formenn stjórnarandstöðunnar furða sig á því að enginn í þingflokki Sjálfstæðismanna njóti trausts til þess að verða ráðherra. Ummæli Bjarna um að hann hefði leitað til Ólafar Nordal til að fá ráðherra sem nyti óskoraðs trausts hafa vakið athygli.

Stefanía Óskarsdóttir stjórnmálafræðingur segir í viðtali við Stöð 2 að löng hefð sé fyrir því að leitað sé til þingflokksformannsins þegar ráðherraembætti losni. Hún telur mögulegt að afstaða Ragnheiðar Ríkharðsdóttur þingflokksformanns Sjálfstæðisflokksins til Evrópumála hafi haft áhrif og jafnvel tengsl hennar við Þóreyju Vilhjálmsdóttur fyrrverandi aðstoðarmann innanríkisráðherra. Ragnheiður Ríkharðsdóttir segir fáránlegt ef svo sé, Hún neitar því ekki að hafa sóst eftir embættinu og segist hugsi yfir niðurstöðunni.

Þau Árni Páll Árnason, formaður Samfylkingarinnar, Katrín Jakobsdóttir formaður VG, Birgitta Jónsdóttir kapteinn Pírata, Guðmundur Steingrímsson formaður Bjartrar framtíðar segja ákvörðun um nýja innanríkisráðherra hafa komið á óvart, en fagna jafnframt endurkomu Ólafar Nordal í stjórnmálin.

Árni Páll segir að sé hægt að færa rök fyrir því að sækja ráðherra út fyrir þingflokkinn. Það sé hinsvegar sérkennilegur rökstuðningur að hann hafi viljað velja ráðherra sem hefði ótvíræðan stuðnings sjálfstæðismanna. Það séu mjög kaldar kveðjur til þingflokksi Sjálfstæðisflokksins.

Guðmundur Steingrímsson segir að þetta hljóti að þýða að þingflokkurinn njóti ekki nægilegs trausts. Birgitta Jónsdóttir segist skynja að margir hafi orðið fyrir vonbrigðum og horft sé framhjá mjög frambærilegu fólki eins og Ragnheiði Ríkharðsdóttur.

Ólöf Nordal og Bjarni Benediktsson hafa verið mjög nánir samstarfsmenn í gegnum tíðina og Ólöf er fyrrverandi varaformaður flokksins.

Stefanía segir að hann hafi greinilega lent í klemmu við að gera upp á milli fólks. En hvaða áhrif hefur þetta á stöðu Hönnu Birnu og endurkomu hennar í stjórnmálin? „Ég held að með þessari ráðstöfun, að sækja út fyrir þingflokkinn og fá í liðið fyrrverandi varaformann, finnst manni að hann sé jafnvel að leggja drög að því að fá hana aftur í varaformannsembætti og Hanna Birna sé mögulega á leiðinni úr stjórnmálum,“ segir hún.