Hugmynd komin á samningaborðið í læknadeilunni

„Það er komin fram hugmynd á samningaborðið, en alls ekkert tilboð. Við hittumst aftur á sunnudag,“ segir Þorbjörn Jónsson, formaður Læknafélags Íslands, eftir stuttan fund hjá Ríkissáttasemjara í kvöld.

Þorbjörn tekur fram að hugmyndin sem lögð var fram komi ekki í veg fyrir að læknar leggi niður vinnu sína á mánudag og enn miði fremur hægt í kjaraviðræðum. Verkfallsaðgerðir lækna hafa nú staðið yfir í rúman mánuð.

Magnús Pétursson, ríkissáttasemjari, segist vongóður um að viðræðum miði betur áfram eftir fundinn.  „Ég fékk samningsaðilum verkefni að leysa út frá ákveðinni hugmynd og við hittumst klukkan 10 á sunnudagsmorgunn og tökum upp viðræður.“