Læknar og ríki ræða launatöflur og vaktafyrirkomulag

Samninganefndir ríkis og lækna koman saman í húsakynnum Ríkissáttasemjara klukkan tvö í dag. Tæknileg atriði voru rædd í síðustu viku að sögn formanns Læknafélags Íslands sem segir samstöðu meðal lækna aldrei hafa verið meiri en nú.

Þungi færðist í viðræðurnar í síðustu viku en þá var fundað þrisvar sinnum. Þorbjörn Jónsson, formaður Læknafélags Íslands, segir að vikan sem var að líða hafi farið í að ræða tæknilegar útfærslur.

Þó svo að aukinn þungi í viðræðum bendi vissulega til þess að árangur sé að nást í deilunni þá segir Þorbjörn algjöra óvissu ríkja um framhaldið.

„Það liggur ekkert tilboð á borðinu. Það er hægt að segja það fullum fetum. En men hafa verið ræða tæknileg útfærsluatriði. Þannig að þegar það kemur að því að ræða stærstu málin þá geta samningar gengið hraðar fyrir sig en ella,“ segir Þorbjörn.

Hverjar eru þessar tæknilegu útfærslur?

„Það sem fer fram á fundunum er auðvitað trúnaðarmál. En þarna gæti verið um að ræða atriði í kringum launatöflu, vaktafyrirkomulag og eitthvað slíkt.“

Engar verkfallsaðgerðir eru boðaðar í þessari viku. En í næstu viku verða allir læknar í verkfalli, annað hvort fyrri part viku eða seinni.

„Þar með lýkur þessari sjö vikna lotu. Síðan erum við að ganga til atkvæða um verkfall eftir áramótin, það yrði þá aðgerð sem felur í sér þriggja mánaða verkfallsboðun.“

Rafræn kosning um framhald aðgerða hefst í þessari viku og niðurstaðan kemur til með að liggja fyrir eftir helgi.

Verkfallsaðgerðir lækna hafa haft gríðarlega áhrif. Um sjö hundruð aðgerðum hefur verið frestað og biðlistar hafa á mörgum sviðum lengst mikið. Þorbjörn segir umræðu um þessi áhrif aðgerðanna ekki hafa dregið kjarkinn úr læknum.

„Við héldum fund í síðustu viku þar sem við vorum að kynna aðgerðirnar fyrir læknum. Það er alveg óhætt að fullyrða að samstaða og einhugur meðal lækna var ekki lakari en áður við fórum af stað í þessa verkfallslotu sem nú er í gangi.