Biðjast afsökunar á mistökum sem urðu við útsendingu Skrekks

Sjónvarpsstöðin Skjár Einn hefur beðist afsökunar á miðstökum sem urðu við beina útsendingu Skrekks á mánudagskvöldið.

„Vegna tækniörðugleika var lokað fyrir útsendinguna á myndlyklum Vodafone og þegar okkur varð kunnt um mistökin reyndum við eftir bestu getu að leiðrétta þau og var í kjölfarið opnað fyrir keppnina á plúsrásinni okkar,“ segir í tilkynningu stöðvarinnar á Facebook síðu hennar.

Þar kemur einnig fram að ólíklegt sé að allir hafi fengið þær upplýsingar á meðan sýningu keppninnar stóð og því verður boðið uppá aðra möguleika fyrir þá sem misstu af keppninni til að sjá hana.

Skrekkur verður í endursýningu í opinni dagskrá á SkjáEinum sunnudaginn 23. nóvember klukkan 14:10. Keppnin er nú þegar kominn inná SkjáFrelsi á heimasíðu stöðvarinnar og er aðgengileg öllum. 

„Að lokum viljum við óska keppendum í Skrekk innilega til hamingju með frábæra keppni og vel gerð atriði. Það er greinilegt að allir krakkarnir sem stigu á stokk á sviði Borgarleikhússins hafi lagt mikinn metnað í sín atriði.“