Wenger: Özil ekki kominn yfir vítaklúðrið

Arsene Wenger, knattspyrnustjóri Arsenal, segir MesutÖzil enn í sárum eftir að hafa klúðrað vítaspyrnu á upphafsmínútum Meistaradeildarleiksins gegn Bayern München á miðvikudaginn.

„Er í lagi með hann núna? Svo sannarlega ekki því 48 klukkustundir er frekar stuttur tími til að komast yfir svona lagað,“ sagði Wenger á blaðamannafundi í dag en liðið tekur á móti Sunderland á morgun.

Wenger segir Özil í sömu sporum og Dennis Bergkamp sem klúðraði vítaspyrnu á 90. mínútu í undanúrslitum bikarsins gegn Manchester United 1999.

PeterSchmeichel varði spyrnuna, United vann leikinn í framlengingu manni færri og endaði tímabilið á því að vinna þrennuna. Sá hollenski var ekki vinsæll eftir vítaklúðrið og tók aldrei aftur víti fyrir liðið. Hann er eftir sem áður í guðatölu hjá stuðningsmönnum í dag.

„Við sáum dæmi um svona eins og Bergkamp 1999. Hann neitaði að taka víti aftur eftir klúðrið gegn United. En nú fær hann styttu af sér fyrir utan völlinn,“ sagði Wenger en stytta af Hollendingnum verður afhjúpuð fyrir leikinn.

„Við gefum Özil tíma til að komast yfir þetta. Það er hluti af hans starfi að komast yfir svona vonbrigði og sýna hvernig hann svarar mótlætinu,“ sagði Arsene Wenger.