Samgöngustofa á móti fyrirhuguðum breytingum á umferðarlögum

Tillögur umhverfis- og samgöngunefndar um breytingar á frumvarpi innanríkisráðherra um umferðarlög eru til þess fallnar að draga úr umferðaröryggi að mati Samgöngustofu. Í svari Samgöngustofu við fyrirspurn Vísi um breytingartillöguna kemur fram að tillögur nefndarinnar gangi gegn fyrri umsögnum og afstöðu stofnunarinnar.

Vísir greindi frá tillögunum nefndarinnar í gær en þær fela í sér að fallið verði frá fyrirhuguð lagaákvæði sem takmarkar aðgang fólks á léttum bifhjólum, eða „vespum“, að götum með háan umferðarhraða. „Gangi þessi tillaga eftir má því aka léttu bifhjóli í flokki I á hvaða akbraut sem er,“ segir í svarinu.

Frumvarpið sem upphaflega var lagt fram gerir ráð fyrir að skilgreina létt bifhjól sem komast upp í 25 kílómetra hraða á klukkustund sem bifhjól en ekki reiðhjól, líkt og gert er í dag. Frumvarpið gerir einnig ráð fyrir því að enginn undir fimmtán ára aldri megi aka um á slíku hjóli en nefndin vill lækka það niður í 13 ára.

„Samgöngustofa bendir á að notkun stálpaðra barna og unglinga á léttum bifhjólum hefur stóraukist undanfarin ár og sýnir reynslan að þekkingu þeirra og þjálfun til aksturs er oft ábótavant,“ segir í svari Samgöngustofu. „Til dæmis hefur lögreglan ítrekað þurft að hafa afskipti af hættulegri aksturshegðun þeirra auk þess sem Samgöngustofu berast ótal ábendingar um slíkt.“

Þá Samgöngustofa einnig andsnúin þeim fyrirætlunum umhverfis- og samgöngunefndarinnar að tillaga um vátryggingarskyldu verði felld brott enda gildi sömu lögmál um þessi hjól eins og önnur skráningarskyld ökutæki.