Mikill viðbúnaður vegna sýruleka í flutningaskipi

Slökkviliðið á höfuðborgarsvæðinu þurfti  að grípa til umfangsmikilla aðgerða þegar í ljós kom að fjörutíu lítrar af baneitraðri sýru hefðu lekið úr gámi flutningaskips sem kom til landsins í gærkvöldi. Afar sjaldgæft er að slík atvik komi upp.

Flutningaskipið Reykjafoss, sem  siglir fyrir Eimskip, lagði af stað hingað til lands frá Kanada fyrir um hálfum mánuði.  Á mánudag veitti áhöfn skipsins  því athygli að óþekkt efni læki úr einum af gámunum um borð, en það var eiturefnagámur sem innihélt nokkur hundruð lítra af rafgeymasýru, auk metanóls sem notað er til að blanda út rúðuvökva. Því var ákveðið að sigla skipinu til hafnar. 

„Í gær fengum við fréttir af þessu og fórum strax í að gera ráðstafanir, hafa samband við yfirvöld og undirbúa komu skipsins til landsins. Þá er beðið með að aflesta restina af gámunum þar til að gengið verður úr skugga um að allt sé í lagi,“ segir Ólafur William Hand, upplýsingafulltrúi Eimskips.

Ef skipið hefði verið affermt með venjulegum hætti hefðu þeir sem meðhöndla gáminn verið í stórhættu, en lífshættulegt er að komast í snertingu við sýruna eða anda henni að sér. Fyllsta öryggis var því gætt í aðgerðum slökkviliðs, en frétta- og myndatökumaður þurftu  til að mynda að halda fjarlægð frá gámnum og snúa undan vindi.

„Svona aðstæður eru alltaf hættulegar. Við erum með menn í öryggisbúningum og sá sem er að keyra lyftarann er með reykköfunartæki, svo fyllsta öryggis sé gætt,“ segir Árni Ómar Árnason, varðstjóri hjá slökkviliðinu.

Mjög sjaldgæft er að slík atvik komi upp, enda stöngum öryggiskröfum fylgt þegar raðað er í gámana. Veður hefur þó verið afar slæmt síðustu daga, og ljóst að mikið hefur gengið á, og sýra og farið um allan gáminn.

Slökkviliðið var að störfum um sjö klukkutíma en að því loknu var efnunum eytt. Enn er unnið að því að þrífa og yfirfara skipið.