"Ég kalla þetta fríkeypis heilun“

Þórgnýr Thoroddsen, varaborgarfulltrúi Pírata og formaður ÍTR, lenti í stappi á Schiphol-flugvellinum í Amsterdam er hann var á heimleið úr fræðsluferð menningar- og ferðamálaráðs Reykjavíkur.

„Ég vissi að þarna hafði verið hætt með hefðbundin málmleitartæki og í staðinn eru notaðir líkamsskannar,“ segir Þórgnýr. Slíkt tæki tekur mynd af líkamanum með því að skjóta hátíðnibylgjum á hann. Með því sést hvort aðili er að fela eitthvað innan klæða. Þórgnýr hafði ekki áhuga á því að fara í slíka skönnun og óskaði eftir líkamsleit í staðinn.

„Öryggisvörðurinn krafði mig um gilda ástæðu fyrir þeirri afstöðu en eftir smá stapp var leitað á mér á gamla mátann. Ég kalla þetta fríkeypis heilun.“

Í kjölfar þessa hafi hann sent stjórnendum vallarins bréf og bent á vankanta málsins. Honum hafi borist svar frá öryggisyfirvöldum þar sem fram kemur að réttur farþega verði ítrekaður við öryggisverði flugvallarins.