Framkvæmdastýra Kvennaathvarfsins: Segir íslenska eiginmenn kúga múslimakonur

Sigþrúður Guðmundsdóttir, fræðslu- og framkvæmdastýra Kvennaathvarfsins, segist þekkja „allmargar“ múslimakonur sem hafi verið kúgaðar og látnar líða fyrir það að vera konur. Hún segir að henni myndi ef til vill ganga betur að skilja neikvæð viðbrögð sumra við byggingu mosku í Reykjavík ef múslimar hefðu staðið á bak við þetta ofbeldi, en ekki íslenskir eiginmenn kvennanna.

Þetta skrifar hún í aðsendri grein sem birtist í Reykjavík vikublað í gær. Lýsingar Sigþrúðar á meðferð kvennanna sem um ræðir er frekar sláandi. Hún segir þær hafa verið lamdar, brenndar, bitnar, þeim nauðgað og nefnir fleiri dæmi um óhugnanlegt ofbeldi. Þetta ofbeldi hafi „oftast“ verið af hálfu Íslendinga.

Hún segist ekki skilja hvers vegna „fólk sem ekki aðhyllist nein trúarbrögð getur þolað kirkjur um allar jarðir en ekki tilhugsunina um eina mosku.“ Ennfremur segist hún ekki skilja hvers vegna fólk sem er í „í öruggu sambandi við guðinn sinn sér ógn í því að aðrir fái tækifæri til að byggja upp samband við sinn guð.“

Orðrétt segir Sigþrúður í greininni:

Ég þekki allmarga múslima, aðallega konur og börn. Konurnar hafa næstum allar verið kúgaðar og þær hafa liðið fyrir það að vera konur enda kynnist ég þeim í húsi þar sem konur koma í kjölfar kynbundins ofbeldis og kúgunar. Þær hafa verið lamdar, brenndar, bundnar, skornar og bitnar, það hefur verið sparkað í þær, þær dregnar á hárinu, höfðinu á þeim haldið ofan í vatni, þeim kastað niður af svölum og hent út úr bíl á ferð.

Þeim hefur verið nauðgað, þeim hefur verið hótað öllu illu og þær hafa verið uppnefndar, spottaðar, skammaðar, niðurlægðar og ásakaðar. Ég held að mér gengi örlítið betur að skilja umræður dagsins um moskur og múslima ef þessar konur hefðu verið beittar ofbeldi af hálfu múslímskra samlanda sinna en ekki íslenskra eiginmanna eins og reyndar er oftast tilfellið.