Segja heimsóknir skólabarna í kirkjur vera tímaskekkju

Landstjórn Ungra vinstri grænna segir heimsóknir leik- og grunnskólabarna í kirkjur vera tímaskekkju. Slíkar heimsóknir séu í eðli sínu trúarinnræting og þær hampi einu trúfélagi og sjónarmiðum þess umfram önnur trú- og lífsskoðunarfélög.

„Telja Ung vinstri græn að fyrirkomulagið ýti undir félagslegan aðskilnað og ójöfnuð milli barna í Þjóðkirkjunni annars vegar og barna í öðrum trúfélögum eða utan þeirra hins vegar,“ segir í ályktun sem samþykkt var af landstjórn Ungra vinstri grænna í dag.

Þau vilja einnig að fræðsla um trúarbrögð fari fram á sem hlutlausustum grundvelli þar sem jafnræðis sé gætt í umfjöllun um ólík trúarbrögð. Slíkri kennslu eigi að vera sinnt af kennurum.

„Enn fremur ítreka Ung vinstri græn þá kröfu hreyfingarinnar að ríki og kirkja verði aðskilin.“