Farþeginn fluttur á spítala

Einstaklingurinn, sem grunur lék á að væri með ebólu og lent var með á Keflavíkurflugvelli í dag, var ekki með nein einkenni ebólu.

Hann er nú á leiðinni á spítala engu að síður þar sem hann var með krampa og froðufelldi, samkvæmt upplýsingum frá almannavörnum.

Íslenski læknirinn sem fór um borð í vélina tilkynnti að ekki væri um ebólusmitaðan einstakling að ræða. Vélin er ekki farin aftur í loftið en fer af landi brott innan skamms.

Unnið var eftir viðbragðsáætlun vegna ebólu sem verið hefur í vinnslu undanfarið. Sóttvarnalækni var gert viðvart sem og Landspítala og Heilbrigðisstofnun Suðurnesja. Samhæfingarstöðinni í Skógarhlíð og aðgerðastjórn í umdæmi lögreglustjórans á Suðurnesjum voru virkjaðar vegna atburðarins.

Flugvélin var frá erlendu flugfélagi og var ekki að koma frá einu af þeim þremur ríkjum þar sem ebóla er útbreidd. Maðurinn reyndist vera að koma frá Suður-Afríku.