Áreitti 14 ára stúlku í gegnum Facebook og Skype

Héraðsdómur Reykjaness hefur dæmt 23 ára gamlan karlmann í sex mánaða skilorðsbundið fangelsi fyrir að áreita 14 ára stúlku kynferðislega í gegnum samskiptamiðlana Facebook og Skype, sem og í gegnum sms. Brot mannsins voru framin í maí og júní 2013.

Í ákæru var manninum gefið að sök að hafa rætt við stúlkuna á kynferðislegan hátt og beðið hana um að hitta sig til þess að hafa við hana kynferðismök. Auk þess var honum gefið að sök að hafa sýnt stúlkunni kynfæri sín á meðan hann fróaði sér og fengið stúlkuna til að sýna sér ber brjóst hennar, hvort tveggja í gegnum vefmyndavél.

Maðurinn játaði skýlaust brot sín, bæði á rannsóknarstigi málsins og fyrir dómi. Var það metið til refsilækkunar auk þess að maðurinn hefur ekki hlotið refsidóm áður. Ungur aldur stúlkunnar, sem manninum var kunnugt um, var hins vegar metinn til refsihækkunar.

Var maðurinn dæmdur í 6 mánaða skilorðsbundið fangelsi til þriggja ára og greiðslu sakarkostnaðar. Þá var hann dæmdur til að greiða stúlkunni 400.000 krónur í miskabætur.