Mjög líklega myglusveppur í Árseli

Grunur leikur á að myglusveppur hafi fundist í frístundamiðstöðinni Árseli í Árbæ.  Líkt og Vísir greindi frá í gær fundust óhreinindi undir parketi í frístundamiðstöðunni, en samkvæmt forstöðumanni Ársels liggja niðurstöður um hvort myglusvepp sé að ræða ekki fyrir.

Samkvæmt minnisblaði skoðunaraðila frá 28.nóvember 2013 mátti sjá rakaummerki alls staðar í byggingunni, í límtrésbitum í lofti, dökka tauma og bólgnar loftplötur. Engin tilkynning hefur borist til foreldra barna í Árbæjarskóla vegna þessa.

Töluverður óþefur í húsinu

Í minnisblaðinu segir að í Töfraseli, sem er í kjallara Ársels, hafi raki mælst 90-100 prósent á einum stað, en meðalraki er um 22 prósent. Rakinn mældist undir dúk í innri sal þar sem samskeyti eru á milli útveggja.

Jafnframt kemur fram að búast megi við að þar vaxi mygla og aðrar rakasæknar lífverur. Einnig er við því að búast í danssal Ársels og eru taldar líkur á að myglan hafi náð að vaxa upp í efsta lag gólfflatar.

Nokkur óþefur hafði fundist í húsinu um tíma, en samkvæmt starfsmönnum Ársels hafði óþefurinn ágerst síðastliðið eitt til tvö ár.

Einkenni vegna myglusvepps líkjast oft flensueinkennum. Einkennin tengjast oft efri hluta öndunarvegar, höfuðverkur, erting í augum, stíflað nef og hósti og oft fylgir magaverkur og óþægindi í maga. Sumar tegundir myglusveppa geta valdið ofnæmi og astma eða gert astma verri hjá þeim sem þjást af honum. Áhrifin verða oft meiri hjá ungum börnum, gömlu fólki og þeim sem glíma við sjúkdóma.

Frístundaheimilið Ársel er opið alla virka daga frá kl 13.40 til klukkan 17 fyrir börn í Árbæjarskóla á aldrinum sex til níu ára.