Kveiktu í kesti við Kópavogsskóla

Klukkan þrjú í nótt þurfti Slökkviliðið að sinna útkalli en þá höfðu einhverjir óprúttnir og eldspýtnaglaðir menn tekið sig til, hvolft úr ruslatunnum, gert sér vænan bálköst og svo kveikt í kestinum við Kópavogsskóla.

Að sögn slökkviliðsins er þetta þekkt fyrirbæri á þessum tíma árs, skömmu fyrir áramót, en þá æsast leikar og eru menn venju fremur spenntir fyrir eldfærum. Má ætla að þarna hafi ekki verið nein börn að verki, um miðja nótt en ekki er vitað hverjir brunavargarnir voru.

Slökkviliðið er með nokkurn viðbúnað vegna áramótanna og er viðbótamannskapur kallaður út og menn við öllu búnir. Þá má nefna að óvenju mikið var um útköll sjúkrabíla síðasta sólarhringinn, alls 106 útköll. Dagvaktin í gær var mjög annasöm en þekkt er að hjartaáföll fylgi mikilli hangikjötsneyslu en einnig var um hálku- og umferðarslys að ræða sem sjúkraflutningamenn þurftu að sinna.