Miklar breytingar á málefnum hælisleitenda í haust

Breytingar á lögum um útlendinga voru samþykktar á síðasta starfsdegi Alþingis og er markmiðið meðal annars að stytta biðtíma hælisleitenda. Þá verða ákvarðanir um útlendingamál færðar til óháðrar úrskurðarnefndar sem hefur sömu valdheimildir og ráðherra í kærumálum

„Það skiptir auðvitað gríðarlega miklu máli að það hefur náðst um þetta þverpólitísk sátt, þetta eru gríðarlega miklar breytingar,“ segir Hanna Birna Kristjánsdóttir, innanríkisráðherra. „Við höfum verið að sjá allt of langan afgreiðslutíma sem er ekkert óeðlilegt miðað við hversu bratt þessi verkefni hafa komið upp á íslenskt samfélag, en við vonumst til þess að í staðinn fyrir að fólk þurfi að bíða hér í einhver ár, verði þetta einhverjir mánuðir.“

Stefnt er að því að sjálfstæða kærunefndin taki til starfa í sumar. Í fyrra var metár og bárust þá 172 umsóknir um hæli hér á landi, eða um 47% fleiri en árið á undan. Hann segir þó að vel hafi gengið að fækka málum í vinnslu.

„Við erum að afgreiða þessi mál fjórum sinnum hraðar en fyrir ári síðan. Það er hins vegar ekki nóg og við þurfum að gera betur og ég á von á að strax með haustinu fari hælisleitendur og samfélagið að sjá breytingar á þessu,“ segir hún.

Þannig að við getum búist við því að núna undir lok sumars komi til landsins fyrsti hælisleitandinn sem getur vænst nokkurra mánaða málsmeðferðar í staðinn fyrir nokkura ára?

„Já, við vonum það innilega. Þeir sem koma til Íslands eftir þennan tíma mega vænta þess að fá svar miklu fyrr og ég vona að því fylgi líka vandaðri og betri málsmeðferð.“

Í gær sagði Stöð 2 frá máli Hassans Al Haj sem kvæntur er íslenskri konu en var þó vísað frá Íslandi fyrr í þessum mánuði og bíður úrslausnar sinna mála í Svíþjóð.

Ráðherra kveðst ekki geta tjáð sig um einstök mál en vísar í leiðbeinandi vinnureglur ráðuneytisins, þar sem segir að túlka skuli útlendingalög umsækjendum í vil, meðal annars með tilliti til þess hvort þeir eigi nákomna ættingja hér á landi.

Kristín Völundardóttir, forstjóri Útlendingastofnunar, gaf ekki kost á viðtali en sagði mál Hassans í vinnslu.