Vill að ríkið aðstoði sveitarfélög vegna styttra bótatímabils

Kostnaður sveitarfélaga vegna styttingar atvinnuleysisbótatímabils úr 36 mánuðum í 30 mánuði er áætlaður um 500 milljónir króna á næsta ári. Þetta segir Halldór Halldórsson, formaður Sambands íslenskra sveitarfélaga.

Halldór telur að með styttingu bótatímabilsins sé verið að færa fé úr einum vasa í annan. Eygló Harðardóttir félagsmálaráðherra hefur gefið út að ríkisjóður spari sér um einn milljarð króna á ári með styttingunni.

Um 500 manns missa rétt til atvinnuleysisbóta um áramót og um 1.000 manns til viðbótar á árinu 2015 vegna aðgerðanna.

Að sögn Halldórs hefði þurft að að undirbúa aðgerðirnar betur og hafa meiri fyrirvara á þeim. „Við höfum farið fram á að farið verði í atvinnuátak samhliða styttingunni og að sveitarfélög fái hlut í almenna hluta tryggingargjaldsins. Kostnaður sveitarfélaganna vegna fjárhagsaðstoðar hefur aukist úr 2,5 milljörðum árið 2009 í 5 milljarða á þessu ári að viðbættum þeim 500 milljónum sem við búumst við að bætist við á næsta ári,“ segir Halldór.

Halldór gagnrýnir einnig orð félagsmálaráðherra sem sagt hefur að sveitarfélögin þurfi í meira mæli að nýta sér verkefni atvinnuleysistryggingarsjóðs. „Hvaða verkefni? Við höfum kallað eftir því að farið verið í slíkt en það er ekkert átaksverkefni í gangi,“ segir Halldór.