Rætt við ráðherra um vatnshæð Lagarfljóts

„Landeigendur hafa gert athugasemdir og okkur finnst viðbrögðin við þessu hafa verið harla lítil,“ segir Björn Ingimarsson, bæjarstjóri Fljótsdalshéraðs, sem reynir nú að ná fundi innanríkisráðherra vegna hárrar vatnsstöðu í Lagarfljóti.

Björn segir að vegna hárrar vatnsstöðu sé talsvert landbrot við bakka Lagarfljóts, sérstaklega neðan Egilsstaða.

Fljótsdalshérað er ekki sátt við afstöðu Orkustofnunar til virkjunarleyfis Lagarfossvirkjunar og leitaði umsagnar Skipulagsstofnunar sem benti á að Orkustofnun heyri undir iðnaðarráðherra. Skipulagsstofnun benti „þó á að í matsskylduumfjöllun var miðað við 20 metra vatnshæð og í gildandi deiliskipulagi er vatnshæð Lagarfljóts í aðrennslisskurði og ofan stíflu 20 metrar yfir sjávarmáli.“

Að sögn Björns er deilt um eftirlit með lokum í Lagarfossvirkjun og hvort miða eigi við vatnshæð við Lagarfljótsbrú eins og kveðið sé á um hana í eldra virkjunarleyfi.

„Það er afstaða Orkustofnunar að þessi viðmið eigi við um Lagarfossvirkjun en ekki Lagarfljótsbrúna. Tuttugu metra vatnshæð við virkjunina getur þýtt 21 metra við Lagarfljótsbrú. Það er það sem stendur svolítill styr um,“ segir Björn og útskýrir að eftir því sem vatnshæðin sé meiri við Lagarfljótsbrú aukist landrof þar. „Það fjölgar þeim tilfellum sem túnin og landið á þessu svæði hverfur allt undir vatn með tilheyrandi landskemmdum.“

Björn segir landeigendur hafa gert athugasemdir. „Okkur finnst viðbrögðin við þessu hafa verið harla lítil,“ segir bæjarstjórinn sem tekur þó fram að Landsvirkjun fyrir sitt leyti sé mjög meðvituð um að bregðast þurfi við landbrotinu og hafi kortlagt til að meta hvernig best verði brugðist við.

Lokurnar sem stjórna vatnsrennslinu í gegn um Lagarfossvirkjun eru handstýrðar. Bæjaryfirvöld vilja að lokurnar verði sjálfvirkar. „Spurningin er um skráningu. Við viljum að lokurnar séu rafstýrðar en ekki handstýrðar þannig að hægt sé að sýna fram á hvenær þær eru opnar og hvenær lokaðar,“ segir Björn.

Aðspurður segir bæjarstjórinn vissulega ekki alltaf hægt að koma í veg fyrir háa vatnsstöðu. Það sé til dæmis tilfellið í leysingum. „En málið snýst um að menn reyni að lágmarka þetta með því að hafa lokurnar uppi.“