Gifti sig ekki í tippex-sandölum

Mér finnst mikilvægt að vera skemmtilega klædd. Ég er nánast alltaf í litríkum fötum en er meðvitað að prófa að ganga stundum í svörtu. Mér finnst föt eiginlega vera búningar og hef mjög gaman af að blanda saman ólíkum flíkum og sjá hvernig fötin breyta mér og minni líðan. Mér líður mjög illa í gallabuxum og bol, það er bara ekki ég,“ segir Álfrún Helga Örnólfsdóttir leikkona, spurð út í fatastílinn.

Hún segist eiga erfitt með settlegheit og ef svo ólíklega vilji til að litasamsetningin passi of vel saman þegar hún hefur sig til grípur hún til sinna ráða.

„Ég þarf alltaf að hafa smá rokk í lúkkinu. Það gengur ekki að vera settlega greidd, á hælum og í litum sem passa alveg saman. Ef það gerist þá hendi ég inn einum kreisí lit eða skipti hælaskónum út fyrir grófari skó,“

Áttu mörg skópör?

„Mörg, kannski þrjátíu!“

Háir hælar eða flatbotna?

„Oftast flatbotna en hælar eru voða fínir þegar maður nennir þeim.“

Hver er þín helsta tískufyrirmynd?

„Mamma er einn besti stílisti sem ég þekki. Hún blandar saman gersemum úr Rauða krossinum og mjög dýrum flíkum á ótrúlegan hátt. Ætli ég hafi ekki fengið sjálfstraust til að finna minn eigin stíl út af hennar hugrekki í samsetningum.“

Spurð hvort hún kunni að sauma segist Álfrún hafa notað saumavélina talsvert á unglingsárunum í tilraunir. „Ég breytti til dæmis gallabuxum og gekk í þeim á röngunni á tímabili. Ég þyrfti að fara að rifja upp gamla takta.“

Uppáhaldshönnuðir Álfrúnar eru Marc Jacobs, Sonya Rykiel, Matthew Williamson, Chie Mihara og fleiri. Hana dreymir um að versla í KronKron en er líka dugleg við að gramsa í „second hand“-búðum. Bestu kaupin í fataskápnum segir hún brúnan leðurjakka sem hún keypti fyrir tíu árum í Barselóna og notar enn.

En hver eru verstu kaupin?

„Ég lét lita sandala hvíta tveimur dögum fyrir brúðkaupið mitt í sumar hjá ónefndum skósmið. Þegar ég sótti þá litu þeir út fyrir að hafa verið tippexaðir hvítir og voru svo harðir að ekki var hægt að ganga í þeim. Borgaði 10.000 krónur fyrir, fór heim í sjokki og reyndi að sannfæra sjálfa mig um að þetta væri nú bara allt í lagi. Daginn fyrir brúðkaupið, eftir svefnlausa nótt, þræddi ég allar skóbúðir bæjarins og fann loksins skó sem björguðu mér frá því að gifta mig í tippex-skónum.“

Er einhver flík í skápnum í uppáhaldi?

„Prjónuð ullarslá eftir Hönnu Hlíf Bjarnadóttur sem ég keypti í Skúmaskoti í sumar. Ótrúlega falleg hlý og einstök flík.“

Hvað er annars að frétta?

„Ég er að byrja sýningar 6. september á einleiknum mínum KAMELJÓN sem verður á fjölunum í Tjarnarbíói í september og október. Kameljón er ein mest krefjandi en jafnframt skemmtilegasta sýning sem ég hef unnið að og ég hlakka mikið til að sýna hana á ný.“