Mourinho: Fjölmiðlar ættu að skammast sín

Jose Mourinho, knattspyrnustjóri Chelsea, tjáði sig um ummæli sem franska sjónvarpsstöðin Canal Plus birti í gær og fengið hefur mikla umfjöllun í fjölmiðlum ytra.

Ummælin lét Mourinho falla í einkasamtali við forstjóra svissnesks úraframleiðanda á viðburði í síðustu viku. Mourinho vissi ekki að ummælin myndu rata í fjölmiðla.

Meðal þess sem hann sagði var að hann væri í vandræðum með sóknarmenn sína og gantaðist með að Samuel Eto'o væri ef til vill eldri en talið væri.

„Mér finnst að sem fjölmiðlafólk ættuð þið að skammast ykkar því það fer gegn siðferði ykkar að birta ummæli sem voru tekin úr einkasamtali,“ sagði Mourinho á blaðamannafundi í dag.

„Ég er ekki að verja það sem ég sagði. Ég er að gagnrýna eitthvað sem kemur úr ykkar faglega umhverfi.“

„Þessi ummæli voru ekki góð og ég myndi aldrei láta þetta frá mér á opinberum vettvangi. Í fyrsta lagi vegna þess að ég grínast aldrei með svona lagað. Í öðru lagi þá tilheyri ég þeim hópi knattspyrnustjóra sem koma leikmönnum sínum til varnar.“

„Þriðja ástæðan er sú að Samuel Eto'o er Samuel Eto'o. Hann hefur unnið Meistaradeildina fjórum sinnum. Hann var í liðinu mínu þegar ég átti mitt besta tímabil á ferlinum.“

„Þetta var skondið samtal á milli mín og einhvers sem er ekki í knattspyrnuheiminum. Það er algjört hneyksli að einhver hafi verið að taka upp einkasamtal okkar.“