Lengri bið en vanalega á bráðamóttöku Landspítala

„Við höfum haft mjög mikið að gera. Vegna verkfallsins þá erum við mjög fáliðuð. Fólk þarf að bíða lengur en það hefði vanalega þurft að gera en sem stendur höfum við stjórn á þessu,“ segir Amanda Lavis, læknir á slysa- og bráðadeildar Landspítalans í Fossvogi, í samtali við Vísi.

Amanda segir að vísa hafi þurft þó nokkrum með minniháttar meiðsli frá. Hún telur þó að almenningur geri sér almennt grein fyrir ástandinu og því hafi margir með minniháttar meiðsl ekki endilega leitað á bráðamóttökuna. „Því hefur fjöldi sjúklinga ekki verið svo mikill, en þar sem starfsfólk er færra en vanalega þá hefur verið mikið að gera. Við höfum þó stjórn á þessu.“

Amanda segir að læknar hafi verið að mæta á vaktina nú klukkan þrjú en fyrir vaktaskiptin voru fjórir læknar á vakt á bráðamóttökunni. Undir venjulegum kringumstæðum hefðu þeir verið sex. Þá hafi læknar á gjörgæslu einnig færri en vanalega. „Vanalega hefði fleira starfsfólk mætt til vinnu klukkan 14, en þeir þeir sem mættu til vinnu voru færri en vanalega og þau mættu ekki fyrr en klukkan 15.“

Verkfall skurðlækn­a hófst á miðnætti, en verk­fall lækna á flæði- og aðgerðarsviði hófst í gær. Bráðamóttaka, endurhæfingardeildir, öldrunardeildir og fleira fellur undir flæðisvið spítalans en gjörgæsla, skurðstofur, speglanir, svæfing, blóðbanki og fleira undir aðgerðasvið. Verkfallsaðgerðir lækna á geðsviði hefjast á miðnætti og standa í tvo sólarhringa.