Fundu amfetamín og kannabis í húsi á Selfossi

Fíkniefni, þýfi og heimabrugg fundust meðal annars þegar lögreglan á Selfossi, ásamt tveimur fíkniefnahundum, gerði húsleit í íbúðarhúsi þar í bæ í gærkvöldi. Hundarnir fundu tugi gramma af amfetamíni, nokkur hundruð grömm af kannabis og þýfi úr að minnsta kosti tveimur innbrotum í Árnessýslu nýverið.

Einnig fannst lítilsháttar af heimabruggi. Húsráðandi, sem er nálægt fertugur að aldri , var handtekinn á staðnum og vistaður í fangageymslum í nótt og verður rannsókn fram haldið í dag.

Hann er meðal annars grunaður um sölu og dreifingu fíkniefna í ljósi þess hve mikið fannst af fíkniefnum í fórum hans. Maðurinn hefur áður komist í kast við réttvísina.