Velta fyrir sér hvort eldra fólk sé vannýtt auðlind

Samtök félagsmálastjóra á Íslandi  fagna í ár 30 ára afmæli sínu og af því tilefni er boðað til málþings í Bæjarbíói í Hafnarfirði á morgun, fimmtudaginn 6. nóvember 2014. Yfirskrift málþingsins er Ný viðhorf, nýjar leiðir. Felast tækifæri í fjölgun eldra fólks - Vannýtt auðlind?

Rannveig Einarsdóttir sviðsstjóri fjölskylduþjónustu Hafnarfjarðarbæjar segir að það séu klárlega tækifæri í fjölgun eldra fólks og að fyrirlestrarnir sem boðið verði upp á endurspegli það.

„Það er fullt af tækifærum, það er nefnilega munur á elli og aldri og það er það sem við ætlum að m.a. að fjalla um á morgun. Það eru margir áhugaverðir fyrirlesarar og ég er viss um að það eiga eftir að vakna margar spurningar og að við sem störfum í þessum geira eigum örugglega eftir að græða heilmikið á deginum,“ segir Rannveig og hvetur alla sem áhuga hafa á að kynna sér dagskrána á www.hafnarfjordur.is.

Á dagskrá málþingsins eru mörg áhugaverð erindi. Mun Einar Kárason rithöfundur fjalla um uppfinningarleysið, fjallað verður um Gráa gullið, lækningar í heimahúsi og aldur og elli.