Stendur fyrir maraþonsýningu á Hringadróttinssögu

Hin fjórtán ára Ólöf Lena Inaba Árnadóttir átti sér þann draum að sjá Hringadróttinssögu, eða Lord of the Rings, kvikmyndaþríleikinn í bíó en hún var of ung til að sjá myndirnar þegar þær komu út í upphafi síðasta áratugar. Hún tók sig því til og skipulagði maraþonsýningu á öllum þremur myndunum í Bíó Paradís í dag. Fjörtuíu miðar voru í boði og voru þeir allir fráteknir en aðeins fimmtán sóttu miðana sína.

„Þetta var bara draumur hjá henni að sjá þessar myndir í bíó,“ segir Anna Arnardóttir, móðir Lenu, aðspurð um hvað kom til að maraþonsýningin var skipulögð. „Við foreldrarnir að segja frá því þegar við höfðum farið á svona maraþon sýningu þegar þetta var sýnt á sínum tíma. Hún var svo svekkt að hafa misst af því að hún ákvað að reyna að fá svona sýningu í gang.“

Anna segir að vel hafi verið tekið í hugmyndina og að allir fjörtuíu miðarnir sem í boði voru hafi strax verið pantaðir. Í morgun, þegar fyrsta myndin átti að fara í gang, var hinsvegar aðeins búið að sækja fimmtán miða í miðasölu Bíó Paradísar.  Anna segir að Lena hafi ekki ætlað að hagnast á miðasölunni heldur aðeins ná fyrir kostnaði og því áfall að svo fáir sótti miðana sem þeir áttu pantaða.

Ef ekki næst að selja í sætin situr Lena uppi með tugþúsundakróna kostnað vegna sýningarinnar.

Samkvæmt upplýsingum frá Bíó Paradís tekur salurinn 40 manns í sæti og er nú, þegar fyrsta myndin er að klárast, setið í um helmingi sætanna. Enn er því færi fyrir þá sem vilja sjá mynd númer tvö og þrjú – Tveggja turna tal og Hilmir snýr heim – að mæta í Bíó Paradís. Miðaverð er 3.000 krónur. Áætlað er að sýning á mynd númer tvö hefjist fljótlega upp úr tvö.

Ekki náðist í Lenu sjálfa en hún er stödd inni í bíósalnum að klára fyrstu myndina þegar þetta er skrifað.