Hafna ásökunum framkvæmdastjórans

Stjórnendur Íbúðalánasjóðs hafna því alfarið að lagaheimild skorti fyrir stofnun og rekstri leigufélagsins Kletts, eins og Benedikt Sigurðsson, framkvæmdastjóri Búseta á Norðurlandi, hélt fram í Fréttablaðinu í gær.

Stjórnendur Íbúðalánasjóðs segja að með lagabreytingu árið 2012 hafi Íbúðalánasjóði verið heimilað að eiga leigufélag um fullnustueignir sjóðsins. Skortur á reglugerð frá ráðuneyti breyti engu um gildi þeirra laga. „Klettur er sjálfstætt félag sem hefur sitt starfsfólk, sína stjórn og aðra starfsstöð en Íbúðalánasjóður. Stjórn Kletts er skipuð af stjórnvöldum og hvorki starfsmenn né forstjóri Íbúðalánasjóðs hafa aðkomu að rekstri leigufélagsins. Þar er því fullur stjórnunarlegur aðskilnaður. Klettur hefur auk þess engan aðgang að upplýsingum hjá Íbúðalánasjóði. Allt tal um annað er fráleitt,“ segja stjórnendur Íbúðalánasjóðs í tilkynningu.

Þá segir að stjórnendur Íbúðalánasjóðs telji kærumál til ESA vegna leigufélagsins Kletts vera tilhæfulaust.

„Félagsmönnum Búseta Norðurlands er hins vegar í sjálfsvald sett ef þeir telja tíma og fjármunum félagsins vel varið í málarekstur fyrir eftirlitsdómstóli EFTA. Íbúðalánasjóður tjáir sig ekki um málarekstur af því tagi, enda mundu slíkar kærur beinast að ríkisvaldinu, ef til þeirra kæmi.“