Verður á sjúkrahúsi næstu vikur: „Þetta eru mikil brunasár“

Ekki liggur fyrir hvaðan neyðarblysið sem drengur í fjórða bekk í Brekkubæjarskóla kveikti á með þeim afleiðingum að hann hlaut alvarlega áverka kom. Ekkert slíkt blys var til staðar í skólanum að sögn starfsmanns Akraneskaupstaðar.

Ekki af heimili drengsins

„Það er vitað að það hefur einhver nemandi komið með þetta með sér. Það eru auðvitað engin neyðarblys í skólanum þannig að einhver nemandi hlýtur að hafa borið þetta í skólann,“ segir Helga Gunnarsdóttir, framkvæmdastjóri fjölskyldusviðs Akraness.

Faðir drengsins hefur fullyrt að ekkert neyðarblys hafi verið til staðar á heimili fjölskyldunnar. Því hefur verið velt upp hvort blysið sé úr smábátaútgerð sem er í grennd við skólann. Það er þó ekki vitað. „Þetta er náttúrulega hvatning fyrir þá sem þurfa að eiga svona blys í sínum bátum að þar komist ekki hendur barna,“ segir Helga.

Sendur beint í aðgerð

Drengurinn var fluttur beint á gjörgæsludeild þar sem hann undirgekkst aðgerð. Að sögn Helgu er drengurinn enn á spítala og mun líklega vera þær næstu vikur. „Hann hefur orðið fyrir talsvert miklum bruna og verður á sjúkrahúsi vikum saman,“ segir Helga.

„Þetta eru mikil brunasár. Það er mjög sorglegt því þau eru bæði mjög sársaukafull og skilja eftir ör,“ segir Helga aðspurð um áverkana sem drengurinn hlaut. Atvikið átti sér stað í miðri kennslustofu og urðu samnemendur drengsins fyrir miklu áfalli.

Stendur hjálp til boða

„Það var fundur  samdægurs með áfallateyminu og með foreldrum,“ segir Helga um viðbrögð skólans. „Foreldrar voru upplýstir um að það myndi vera talsverð vanlíðan hjá þeim sem voru viðstaddir í einhverjar vikur.“

Hún segir að starfsmenn skólans séu meðvitaður um að gefa þurfi nemendur svigrúm til að spyrja spurninga og leita aðstoðar. „Áfram verður aðgengi að skólasálfræðingi, skólahjúkrunarfræðingi og námsráðgjafa.“

Skólahald með eðlilegum hætti

Strax á mánudag, þegar atvikið átti sér stað, var tekin ákvörðun um að skólahald yrði með óbreyttu sniði nú í vikunni. „Við svona atburði er best að koma hvunndeginum af stað,“ segir Helga. „Það er ráðgjöf þeirra sem vita mest um svona áföll.“

Áfram verður þó unnið að því að bæta líðan nemenda. „Skólinn hefur mikinn skilning á því að það þarf að hlúa vel að börnunum og auðvitað foreldrar líka,“ segir Helga.