Fagna ályktun borgarstjórnar um griðasvæði hvala

Hvalaskoðunarsamtök Íslands fagna því að Reykjavíkurborg skuli skora á ríkisstjórnina um að stækka griðasvæði hvala í Faxaflóa, en borgarstjórn samþykkti samhljóða ályktun þess efnis í gær.

Hvalaskoðunarsamtökin hafa um árabil barist fyrir stækkun hvalaskoðunarsvæðisins í Faxaflóa en þar fer jafnframt stærstur hluti hrefnuveiða fram.

Í tilkynningu frá samtökunum segir að stuðningur borgarstjórnar við stækkun griðasvæðisins sé áfangasigur og að sérstaklega ánægjulegt sé að hann sé þverpólitískur.

Vona samtökin að ályktun borgaryfirvalda muni hafa tilætluð áhrif, meðal annars þegar kemur að þingsályktun um mat á heildarhagsmunum vegna hvalveiða.