Aron: Ég vonaði að Ísland kæmist á HM

Aron Jóhannsson, framherji AZ Alkmaar og bandaríska landsliðsins, var í ítarlegu viðtali í sérstöku HM-blaði tímaritsins Howler Magazine.

Meðal þess sem ber á góma í viðtalinu er sú ákvörðun Arons að leika fyrir landslið Bandaríkjanna og viðbrögðin við þeirri ákvörðun hér á landi.

Aron er fáorður um aðdraganda og eftirmála ákvörðunarinnar, en fram kemur að hann sé jafnan var um sig í samskiptum við fjölmiðla og gefi þeim ekki tækifæri á að mistúlka ummæli sín.

"Ég hef lært að þú getur ekki grínast of mikið í fjölmiðlum," segir Aron í viðtalinu við Howler, en hann rifjar upp atvik sem átti sér stað eftir leik með AGF gegn AaB frá Álaborg.

Aron skoraði glæsilegt mark í leiknum og í viðtali eftir leikinn sagði hann að það hefði ekki verið heppnisstimpill yfir því og að svona mörk væru komin af æfingasvæðinu.

Fyrirsögninni "Aron: Ég skora svona mörk á hverjum degi. Ekkert mál", var skellt fram. "Þetta var ekki gott mál," segir Jóhann Gíslason, faðir Arons, í viðtalinu við Howler. "Það leit út eins og hann væri hrokafullur."

Fram kemur að Aron hafi leitað ráða hjá Ernie Stewart, fyrrverandi landsliðsmanni Bandaríkjanna og yfirmanni knattspyrnumála hjá AZ Alkmaar, þegar kom að því að velja milli Íslands og Bandaríkjanna.

"Miðað við alla hans hæfileika og alla þá kosti sem hann býr yfir, þá fannst mér hann passa vel inn í bandaríska landsliðið, þar sem hann fengi tækifæri til að spila og vera um leið hluti af þeim uppgangi sem nú er í bandarískum fótbolta" segir Stewart, sem fæddist í Hollandi og hefur, líkt og Aron, tvöfalt ríkisfang. Hann ber mikið lof á Aron.

"Hann hefur sannað sig sem markaskori," segir Stewart sem lék 101 landsleik og skoraði sjö fyrir Bandaríkin á árunum 1990-2004. Hann sagði Aron minna sig á hollenska framherjann Ruud van Nistelrooy.

"Aron er baneitraður inni í vítateignum og hann hreyfir sig mjög vel án boltans."

En þrátt fyrir að hafa kosið að spila fyrir Bandaríkin segist Aron enn bera taugar til íslenska landsliðsins og hann vonaðist til að Ísland kæmist á HM.

"Ég var mjög spenntur," sagði Aron um umspilsleiki Íslands og Króatíu síðasta haust.

"Ég vonaði svo innilega að Ísland myndi komast á HM. Ég vissi að ef þeir myndu komast þangað, þá myndu þeir lenda í riðli með Bandaríkjunum," sagði Aron og bætti í léttum dúr við að "það hefði verið magnað: að vinna Ísland á HM!"