Klinsmann: Aron er að venjast álaginu

Bandaríska landsliðið undirbýr sig nú að kappi fyrir HM í Brasilíu sem hefst á fimmtudaginn. Undanfarið hefur liðið dvalið við æfingar í Jacksonville í Flórída, en í gær unnu Bandaríkin Nígeríu í síðasta vináttulandsleiknum fyrir átökin í Brasilíu.

Mikill hiti er í Jacksonville, í kringum 30 stig, en Jurgen Klinsmann, þjálfari liðsins, leitast við að undirbúa sína menn fyrir hitann sem verður í Brasilíu í sumar.

"Þetta er frábær undirbúningur, við þurfum á þessu að halda," sagði Michael Bradley, miðjumaður Bandaríkjanna, í samtali við NBC, og framherjinn Aron Jóhannsson tók í sama streng.

"Það er mjög, mjög heitt," sagði Aron. "Það er næstum því erfitt að ná andanum hérna, en svona verður þetta í Brasilíu. Vonandi getum við vanist hitanum hérna og verið tilbúinir þegar við komum til Brasilíu."

Aron, sem var þriðji markahæstur leikmaður hollensku úrvalsdeildarinnar á nýafstöðnu tímabili, hefur ekki verið í byrjunarliði Bandaríkjanna í þremur síðustu leikjum liðsins. Klinsmann segir hann vera að venjast álaginu.

"Aron er að venjast álaginu í undirbúningnum fyrir HM og það er mikið á hann lagt," sagði Klinsmann. "Hann hefur átt í smá vandræðum og þess vegna spilaði hann ekki gegn Tyrklandi - því hann þurfti á hvíld að halda."

Bandaríkin leika gegn Ghana í sínum fyrsta leik á HM þann 16. júní.