Juande Ramos: Leikmenn Tottenham átu McDonalds eftir æfingar

Spánverjinn Juande Ramos er þjálfari úkraínska liðsins Dnipro Dnipropetrovsk sem Tottenham mætir í Evrópudeildinni annað kvöld.

Ramos var ráðinn til Tottenham sumarið 2007 eftir að gera flotta hluti með Sevilla á Spáni. Undir hans stjórn vann liðið deildabikarinn 2008 sem var fyrsti titill liðsins í níu ár, sá annar á 17 árum og er enn í dag sá síðasti sem liðið vann.

Tottenham vann erkifjendurnar í Arsenal í undanúrslitum deildabikarsins 2008 og Chelsea í úrslitaleiknum. Allt virtist vera í blóma þar til á næstu leiktíð þegar liðið gat ekki keypt sér sigur. Ramos var rekinn eftir átta leiki. Tottenham var með tvö stig á botni deildarinnar og Spánverjinn yfirgaf White Hart Lane eftir aðeins 364 daga í starfi.

Hann var mjög ósáttur við brottreksturinn á sínum tíma og skaut föstum skotum að leikmönnum liðsins. Sagði lifnaðarhætti þeirra ekki merkilega en fram hafði komið í fréttum að stjórinn lét leikmennina meðal annars borða barnamat til að laga matarræði þeirra.

Í viðtali við Guardian rifjar Ramos upp dagana hjá Tottenham og talar þar mikið um matarræði Tottenham-liðsins á þeim tíma. „Án þess að vera bitur get ég í sannleika sagt að sumir leikmennirnir voru, já, feitir,“ segir Ramos.

„Íþróttamenn þurfa vera í fullkomnu formi. Líkaminn er þitt lifibrauð. Þú getur ekkert lifað eins og hver annar maður sem fær sér eftirrétti eða kökur. Ef þú borðar köku ertu að setja dísel á tankinn. Íþróttamenn verða að nota ofur-eldsneyti. Það er náttúrlega galið að íþróttamaður, sem fær kannski sex milljónir Evra í laun á ári, reyki, drekki og borði óhóflega.“

Ramos átti erfitt með að fá leikmenn Tottenham til að fara eftir sínum ráðum. Eftir æfingar sá hann þá til dæmis keyra inn á skyndibitastað og fá sér að borða.

„Ríkur strákur sem er kannski 22 eða 23 ára vill eflaust ekkert að einhver annar segi honum hvað hann megi borða. Við æfðum ekki langt frá McDonalds-stað og þar sáum við þá borða hamborgara og drekka kók. Ég gat ekki farið heim til þeirra og horft á þá borða en við gátum vigtað þá eftir æfingar. Ef þeir voru ekki í standi fengu þeir ekki að æfa með aðalliðinu,“ segir Juande Ramos.