Vill gæslu í kirkjunni á meðan sveitaböll fara fram

Skemmdarverk voru unnin á kirkjugarði Akureyjarkirkju í Landeyjum um helgina eftir sveitaball í Njálsbúð. Legsteinar voru sparkaðir niður, krossar skekktir, ljóskastari brotin og lýsing kirkjunnar stórskemmd.

Akureyjarkirkja er falleg sveitakirkja, rúmlega 100 ára gömul í Vestur-Landeyjum og stendur stein snar við félagsheimilið Njálsbúð. Þar var haldið „Halloween-ball“ á föstudagskvöld og einhverjir hafa þá ákveðið að fara í kirkjugarðinn og fremja skemmdarverk þar. Haraldur Júlíusson, kirkjuvörður á varla til orð til að lýsa yfir hneykslun sinni á skemmdarverkunum en  legsteinar voru sparkaðir niður voru krossar skekktir, lýsingin að kirkjunni var skemmd og einn ljóskastari brotin.

„Það er ótrúlegt að fólk skuli leggja sig niður við að óvirða helgidóma eins og kirkjur og kirkjugarða, sem er friðað en svona er lífið“, segir Haraldur og bætir við þegar hann er spurður hvort skemmtistaður og kirkjugarður fari saman. „Ég veit það ekki, það er nú ágætis bil hérna á milli, mér finnst að fólk þurfi ekki að leggjast á kirkjugarðinn þó að það sé að skemmta sér í húsi við hliðina.

Haraldur er ósáttur við að hafa ekki verið látin vita af sveitaballinu og hann vill að gæsla verði í kirkjunni og kirkjugarðinum þegar skemmtanir eru í Njálsbúð.

„Já, ég tel að það þurfi að vera gæsla og mér finnst alveg lágmark að umsjónarmaður kirkjunnar sé látin vita ef það á að vera einhver dansleikur í Njálsbúð. Eins íbúar hérna í næstu húsum, það eru vandræði þegar fólk fær þetta á sig fyrirvararlaust“, segir hann.

En hvaða skilaboð á Haraldur til skemmtaraargsins eða skemmdarvarganna ?

„Bara að gera þetta ekki aftur, virða frið annarra og sýna kirkjum og kirkjugörðum virðingu“.

Lögreglan á Hvolsvelli vill biðla til allra sem hugsanlega hafa einhverjar upplýsingar um hver eða hverjir hafi verið að verki í kirkjugarðinum að koma upplýsingum til sín í síma 488 4110.