Framsóknarterta tollarans

Guðbjörn Guðbjörnsson yfirtollvörður er svo þakklátur Framsóknarflokkinn vegna skuldaniðurfellinganna að hann lét baka tertu honum til heiðurs.

„Myllan bakaði tertuna. Bakarinn kom fram og vildi sjá hver hefði pantað þetta. Þegar ég kom inn sagðist ég vera frá Framsóknarflokknum og þetta væri fyrir þingflokksfund. Fólkið varð vandræðlegt. Ógleymanlegt móment,“ segir Guðbjörn Guðbjörnsson yfirtollvörður og söngvari í samtali við Vísi.

Guðbjörn hefur látið til sín taka í stjórnmálum með margvíslegum hætti. Hann segist ekki sammála Framsóknarflokknum í mörgu, en sannarlega hvað þessar aðgerðir varðar. Og mun hann taka sérstaklega til máls á fundi sem Framsóknarflokkurinn stendur fyrir, en þar stendur til að fagna sérstaklega og ræða nýlegar aðgerðir ríkisstjórnarinnar í skuldamálum húsnæðiseigenda. Vísir skrifaði stutta úttekt þar sem greint var frá þakklátum þegnum þessa lands vegna skuldaniðurfellinganna, þar var Guðbjörn efstur á blaði og vitnaði þingmaður Framsóknarflokksins sérstaklega til orða hans í ræðustól Alþingis.

Ertu orðinn innsti koppur í búri Framsóknarflokksins?

„Það held ég nú ekki. Þeim mun bregða ef þeir byrja afur með ESB málið að ég tali nú ekki um moskumálið eða MS o.s.frv. Nei, ég styð þá í þessu eina máli og síðan vil ég ekkert gefa eftir í samskiptum við kröfuhafana. Ég var frá byrjun (október 2008) andsnúinn nokkrum samningum varðandi Icesave og tók þátt í InDeFence. Að öðru leyti hef ég ýmigust á Framsóknarflokknum. Ég held við verðum í framtíðinni að taka afstöðu til flokka út frá hverju máli fyrir sig en ekki vera flokknum trúir til dauðadags,“ segir Guðbjörn léttur í bragði.

Það verða starfsmenn Tollaraembættisins sem fengu að gæða sér á tertunni, en Guðbjörn segir hana nú ekki síst til komna í gríni og glensi. En viðbrögðin voru blendin og má það heita til marks um hversu umdeilt málið er: „Fussaði fólk ýmist og sveiaði og strunsaði í burt blótandi Framsóknarflokknum eða borðaði af bestu lyst kökuna góðu.“