Þakklátir eignamenn senda ríkisstjórninni kveðjur

Jakob Bjarnar skrifar 11. nóvember 2014 11:10

Guðbjörn Guðbjörnsson tollari hefur tekið Sigmund Davíð í sátt; forsætisráðherra færði honum réttlætið og leiðréttinguna.

Mikill fögnuður og þakklæti í garð ríkisstjórnarinnar braust út víða í nótt og í morgun þegar eignafólk komast að raun um hversu mikið var búið að færa húsnæðisskuldir þeirra niður. Í grófum dráttum má segja að 80 milljörðum hafi verið úthlutað til 90 þúsund manns. Margir voru nánast klökkir þegar þeir tjá sig á Facebook.

Guðbjörn Guðbjörnsson yfirtollvörður og söngvari er einn þeirra en hann segir að sér sé bæði ljúft og skylt að viðurkenna að „... ég hef ranglega ásakað núverandi ríkistjórn undir forystu Sigmundur Davíð Gunnlaugsson og Bjarni Benediktsson vegna skuldaleiðréttingarinnar. Þessum mönnum hefur tekist að leiðrétta að mestu þann forsendubrest, sem ég varð fyrir á árunum 2008-2010. Hafi þeir innilegar þakkir fyrir það.“

Og Guðbjörn heldur áfram og segir að þegar skattfrjálsum lífeyrissparnaði hans er bætt við nemur skuldaleiðréttingin hjá hans rétt um 4 milljónum króna. „Ljóst er að meira en orðin tóm stóðu að baki loforði Sigmundar Davíðs fyrir kosningar. Báðir eiga þeir afsökun skilið frá fjölda fólks - allavega vegna þessa mál. Þetta er bjartasti dagur sem ég hef upplifað frá 6. október árið 2008. Réttlætið sigraði að lokum!“

Ef skautað er yfir samfélagsmiðlana Facebook og Twitter má sjá nokkurn fjölda tjá þakklæti sitt í garð ríkisstjórnarinnar sem í gær kynnti skuldaniðurfellingaáætlanir sínar á kynningarfundi í Hörpu. Sigurður Bogi Sævarsson, blaðamaður á Morgunblaðinu er einn þeirra og hann er gagnorður: „Leiðrèttingin komin. Sàttur. — er þakklát/ur.“ Enn annar fjölmiðlamaður sveipar þakklæti sitt til stjórnvalda og Sigmundar Davíðs Gunnlaugssonar í grín og hálfkæring: „Ég fékk reiðléttingu. Takk.“

Þó margir séu ríkisstjórninni afar þakklátir, eins og sjá má af þessu er það svo, samkvæmt upplýsingum frá mótttöku í forsætisráðuneyti, að ekki er mikið um að forsætisráðherra hafi borist blóm og skeyti.

Innlegg frá Guðbjörn Guðbjörnsson.

Innlegg frá Bæring Jóhann Björgvinsson.

Innlegg frá Ingólfur Þorleifsson.