Stórkostlegt myndband um Íslandsheimsókn

Alex Cornell er nafn sem líklega fæstir Íslendingar kannast við. Cornell er þrítugur íbúi San Francisco í Kaliforníu. Í sumar var hann einn af tæplega milljón ferðamönnum sem hafa heimsóttu Ísland á árinu sem er að líða og ákvað hann að búa til stutt myndband um ferðina.

Ísland var ekki eingöngu heimkynni nýrrar plánetu í Interstellar, kvikmynd Christoper Nolan, heldur er hún það einnig í myndbandi Cornell. Stór hluti þess fer fram við Kröfluvirkjun og Mývatn en náttúran er í algjöru aðalhlutverki.

Planet Iceland - Expedition Memories from Alex Cornell on Vimeo.

„Ég er með fyrirtæki sem kallast Moonbase. Mín vinna snýst oftar en ekki um að gera auglýsingamyndbönd fyrir sprotafyrirtæki hér í kringum San Francisco-flóa en inn á milli geri ég myndbönd í frítíma mínum,“ segir Cornell í samtali við blaðamann.

Hann er í augnablikinu staddur í fríi með móður sinni og systur á Suðurskautslandinu yfir áramótin. Frítíminn þar fer einnig í upptökur og hann segist hlakka til að sjá hvort eitthvað sé varið í myndefnið. Það komi í ljós þegar hann kemst heim til sín á nýjan leik.

„Myndbandið var tekið upp í ágúst á þessu ári en ég hafði áður komið til Íslands. Það var í maí í fyrra og eftir þá heimsókn fékk ég brennandi áhuga á að koma aftur og nýta fegurðina í myndband. Mig hafði langað að heimsækja Ísland í mjög langan tíma áður en ég lét verða af því,“ segir Cornell.

„Við fórum hringinn í kringum landið. Við tókum töluvert upp í Vík í Mýrdal, Mývatni, Kröflu og á Vestfjörðunum. Venjulega ókum við í fjóra til sex tíma og stoppuðum á tuttugu mínútna fresti til að ná að festa landslagið á filmu. Ferðin tók átta daga og við gistum í Vík, Smyrlabjörgum, Egilsstöðum, Mývatni, Hvammstanga, Ísafirði og Þingvöllum.“

Í fyrri ferð sinni til Íslands leitaði Alex lengi að korti til að kaupa sem minjagrip en án árangurs. Hann endaði því að útbúa eitt slíkt sjálfur sem sýndi akstursleiðina auk mynda frá ýmsum stöðum sem hann stöðvaði á. Kortið er rúmur metri á hæð og tæpir tveir metrar á lengd.

„Dvölin á Íslandi var æðisleg. Uppáhalds minningin mín er sennilega að aka suðaustur strönd landsins. Venjulega líkar mér illa að vera lengi í bíl en ég fór sérstaklega til Íslands til að taka langa bíltúra. Að mínu mati er það eitt það besta sem hægt er að gera á landinu,“ segir Cornell.