Leitað að sjötugum Ítala austan við Laugarvatn

„Það er kraftur í leitinni og mjög margir að leita, hér er slydda og hitastigið við frostmark. Allar sveitir í Árnessýslu taka þátt í leitinni, auk þess sem tíu vélsleðar eru á leiðinni til okkar úr Reykjavík frá björgunarsveitum þar“, segir Sölvi Arnarsson, formaður björgunarsveitarinnar Ingunnar á Laugarvatni. Sölvi er einn af þeim sem stjórnar leit af sjötugum Ítala í grennd við bæinn Hjálmsstaði austan við Laugarvatn.

Búið er að kalla út alla vélsleðahópa á höfuðborgarsvæðinu í leitina við Laugarvatn. Nú þegar eru mættir til leitar af Suðurlandi vélsleðahópar þaðan ásamt göngumönnum.

Ítalinn er í heimsókn á Hjálmsstöðum en fór í göngutúr kl. 11:00 í morgun og hefur ekki skilað sér heim.  Talið er að hann sé í þokkalegu formi, ágætlega útbúinn en þó vanbúinn til fótanna til gönguferða við þær aðstæður sem nú eru.

Þetta er önnur leitin í dag á stuttum tíma, sem björgunarsveitir í Árnessýslu fá útkall. Hin var í Grímsnesi í kringum Hestvatn um kl. 14:00 en þar fannst 24 ára Íslendingur eftir að hafa verið týndur frá því í nótt.

Uppfært klukkan 17.45

Maðurinn er fundinn, heill á húfi.