Meðallaun lækna frá 608 þúsundum til 1,7 milljónir

Bæði læknar og skurðlæknar funda með samninganefnd ríkisins í Karphúsinu í dag. Mánaðarlaun lækna eru frá 670 þúsund krónum hjá kanidötum upp í 1,7 milljónir króna hjá yfirlæknum samkvæmt tölum frá fjármálaráðuneytinu.

Skurðlæknar komu til fundar við samninganefnd ríkisins hjá Ríkissáttasemjara klukkan ellefu í morgun og almennir læknar mæta síðan til fundar klukkan tvö. Verkfallið er farið að reyna verulega á heilbrigðiskerfið þar sem þúsundum læknaviðtala, inngripum og aðgerðum hefur verið frestað og afleiðingarnar nú þegar því orðnar mjög miklar.

Ekki er búist við löngum samningafundum í dag samkvæmt heimildum fréttastofunnar.

Vonir um einhvers konar samkomulag kviknuðu þó í vikunni þegar fundir urðu tíðari og lengri og heyrst hefur að menn séu að ræða gerð samnings til skemmri tíma en lagt var upp með. Næsta verkfalslota lækna hefst upp úr áramótum og verða þær mun harðari en fyrri aðgerðir. Þannig munu skurðaðgerðir aðeins verða framkvæmdar á Landsspítalanum á föstudögum og hafa yfirmenn spítalans lýst yfir miklum áhyggjum af áhrifum þessara aðgerða verði þær að veruleika.

Fjármálaráðuneytið birti upplýsingar um meðallaun lækna á vef ráðuneytisins í gær. Þar eru meðtalin öll laun lækna; dagvinnulaun, yfirvinnulaun, vaktaálag, stjórnunarálag, helgunarálag, menntunarálag o.fl.

Meðallaun kandidata á Landsspítalanum árið 2013 eru lægst en þau voru 671 þúsund krónur. Meðallaun almennra lækna voru 858 þúsund, sérfræðinga 1,1 milljón og yfirlækna 1,3 milljónir króna á mánuði. Meðallaun skurðlækna í sérfræðingastétt voru 1,3 milljónir og yfirlækna á skurðdeild 1,7 milljónir króna. Meðallaun lækna hjá Heilsugæslunni á höfuðborgarsvæðinu voru aðeins lægri, eða frá 608 þúsund krónum til 1,2 milljón króna.

Bjarni Benediktsson fjármálaráðherra hefur fullyrt að læknar krefjist á bilinu 40 til 50 prósent launahækkunar en þar er auðvitað átt við grunnlaunin en ekki þau heildar meðallaun sem nefnd voru hér að ofan. Engu að síður væri um tugþúsunda upp í hundruð þúsunda króna launahækkun að ræða. Fjármálaráðherra hefur sagt þessar launakröfur óaðgengilegar þrátt fyrir vilja stjórnvalda til að koma til móts við kröfur lækna, enda myndu þær setja kjaraviðræður á almennum launamarkaði og stöðu efnahagsmála almennt í uppnám.