Labbaði berfættur yfir á næsta bæ eftir hjálp

Allt tiltækt slökkvilið Akureyrar var kallað út klukkan hálffjögur í nótt þegar eldur kom upp á bænum Bjargi í Eyjafjarðarsveit.

Þegar slökkviliðið kom á vettvang voru tvær konur inni í húsinu en karlmaður hafði komist út við illan leik og labbað berfættur eftir ísilögðum vegi á næsta bæ eftir aðstoð, en þangað er um hálfur kílómetri.

Báðum konunum var bjargað út úr húsinu en önnur þeirra var með mikla reykeitrun og var meðvitundarlaus þegar slökkviliðið kom á staðinn.

Eldurinn kom upp í eldhúsi í kjallaraíbúð hússins og var mikill reykur í húsinu, en ágætlega gekk að ráða að niðurlögum eldsins samkvæmt upplýsingum frá slökkviliði Akureyrar.

Konurnar tvær og maðurinn voru svo flutt á slysadeild til frekari aðhlynningar.