„Snarvitlaust veður og hrikalegur veltingur“

„Það er bara snarvitlaust veður. Þetta er hrikalegur veltingur, ölduhæðin 10-12 metrar,“ sagði Rúnar Gunnarsson, skipstjóri á togaranum Gullveri frá Seyðisfirði, í samtali við fréttamann Stöðvar 2, um eittleytið í dag. Gullver var þá statt 11-12 mílur frá landi og eina skipið sem ekki var komið í var úti fyrir Austfjörðum.

Rúnar stefnir inn á Seyðisfjörð og segir að ferðin sækist seint, 3-4 mílur á klukkustund, það sé ekki reynt að keyra. 15 menn eru um borð og býst Rúnar við að komast í var inn á Seyðisfirði um fjögurleytið. Hægt er að fylgjast með ferð skipsins á siglingavefnum Marine traffic.

Önnur skip og bátar sem voru á sjó úti fyrir Austfjörðum í morgun eru ýmist komin í höfn eða í var. Ljósafell SU var nú á öðrum tímanum að leggja upp að bryggju á Fáskrúðsfirði, togarinn Sigurbjörg ÓF var kominn í var inn á Reyðarfirði, Bjartur NK var kominn í höfn á Norðfirði og smábáturinn Gísli Súrsson að bryggju á Stöðvarfirði.

Meðfylgjandi myndband tóku skipverjar á Gullveri fyrr í dag en það sýnir vel aftakaveðrið sem er á miðunum fyrir austan.