Togarar sigla undan dökkrauðri ölduspá

Búist er við ofsaveðri, meðalvindi meira en 28 metrum á sekúndu, um landið austanvert í dag, og stormi um mestallt land. Þannig hljóðar stormviðvörun Veðurstofunnar.

Verst er spáin fyrir fiskimiðin úti fyrir Norðaustur- og Austurlandi. Sjóveðurspáin hljóðar upp á norðan og síðan norðvestan 25-32 metra á sekúndu fyrir Norðausturmið og Austfjarðamið en allra verst er spáin fyrir Austurdjúp, norðvestan 28-35 metrar eftir hádegi.

Ölduspáin á heimasíðu Vegagerðarinnar sýnir vel ofsann sem spáð er. Spáin klukkan 18 í kvöld er eldrauð, í hæsta mögulega skala, fyrir miðin úti fyrir Norðaustur- og Austurlandi. Það þýðir yfir 12 metra ölduhæð, eða öldur hærri en fjögurra hæða íbúðarhús. 

Á siglingavefnum Marine traffic mátti sjá þrjá togara á Austfjarðamiðum í morgun, Ljósafell SU, Sigurbjörgu ÓF og Gullver NS, en þeir voru allir á siglingu í átt til Austfjarðahafna. Ljósafell stefndi til Fáskrúðsfjarðar, Sigurbjörg til Reyðarfjarðar og Gullver til Seyðisfjarðar, sem var lengst úti skipanna kl. 9 í morgun, - átti þá eftir um 30 sjómílna siglingu til Seyðisfjarðar. Þá var Bjartur NK rétt ókominn inn á Norðfjörð. Einn smábátur var á sjó við austurströndina, Gísli Súrsson GK, út af Stöðvarfirði.