Gæsluvarðhald til 22. des: Sagðist „stoltur“ af líkamsárás gegn tveimur stúlkum

Grunuðum síafbrotamanni hefur verið gert af Hæstarétti að sæta gæsluvarðhaldi til 22. desember vegna rannsóknar á alvarlegri líkamsárás án aðdraganda, sem tilkynnt var til lögreglu í síðasta mánuði.

Maðurinn var handtekinn þann 27. nóvember vegna rökstudd gruns um að hafa gengið í skrokk á tveimur stúlkum án nokkurs aðdraganda, að því er fram kemur í dómsorðum. Sjá mátti áverka á annarri þeirra, en hún var með heilahristing og líklega kjálkabrotin, samkvæmt greinargerð lögreglu. Lögregla segist hafa upplýsingar um það að maðurinn hafi í kjölfar árasinnar sent sms-skilaboð þar sem hann kveðst „stoltur af háttsemi sinni.“

Héraðsdómur Reykjaness hafnaði upphaflega kröfu lögreglu um gæsluvarðhald yfir manninum. Í þeim úrskurði eru rakin mörg mál þar sem hann liggur undir rökstuddum grun um refsiverða háttsemi. Meðal annars hefur hann verið kærður fyrir að hafa átt þátt í frelsissviptingu og grófu ofbeldi gegn átján ára dreng á Vogum í Vatnsleysuströnd í ágúst síðastliðnum.