Læknaverkfallið skapar óvissu hjá öldruðum

Læknaverkfallið eykur á kvíða og óvissu hjá öldruðum sem eru ríflega helmingur þeirra sem þurfa á þjónustu Landspítalans að halda. Þetta segir formaður Landssambands eldri borgara en biðlistar eftir aðgerðum hafa lengst verulega vegna verkfallsins.

Frá því verkfallsaðgerðir lækna hófust, fyrir um mánuði, hefur rúmlega fjögur hundruð skurðaðgerðum verið aflýst á Landspítalanum. Auk þess sem fresta hefur þuft fjölda hjartaþræðinga, kransæðamyndatökum og magaspeglunum. Biðlistar spítalans eftir aðgerðum hafa lengst sem um þetta nemur. Þá hefur um tvö þúsund göngudeildarkomum verið frestað. Ríflega helmingur þeirra sem þurfa á þjónustu Landspítalans að halda eru 67 ára og eldri. Ljóst er að verkfallið hefur mikil áhrif á þennan hóp.

Jóna Valgerður Kristjánsdóttir, formaður Landssambands eldri borgara, segir verkfallið auka kvíða hjá mörgu eldra fólki „ Fólk veit ekki hvenær það kemst í aðgerðir sem það hugsanlega er búið að fá greiningu á. Þetta hlýtur að hafa meiri áhrif til lengri tíma litið þegar að biðlistar lengjast eftir því sem verkfallið verður lengra,“ segir Jóna Valgerður.

Páll Matthíasson, forstjóri Landspítalans, segir erfitt að leggja mat á það hversu langan tíma það taki að stytta biðlistana eftir að verkfallinu lýkur. Þá koma biðlistarnir til með að lengjast enn frekar þegar fimmta verkfallslotan hefst, mánudaginn 8. desember, ef ekki verður búið að semja fyrir þann tíma. Enn ber nokkuð í milli deiluaðila. Páll segir að bráðatilfellum sé alltaf sinnt á spítalanum en yfirlæknar hafa orðið varir við það að aldraðir veigri sér, frekar en aðrir aldurshópar, við að leita á spítalann á meðan á verkfallinu hefur staðið. „ Sem sagt eldra fólk sérstaklega sýni jafnvel óþarfa tilitsemi því að eins og við höfum sagt þá eru bráðir hlutir þess eðlis að þeir eiga ekki að bíða og þeim er sinnt í verkfallinu,“ segir Páll Matthíasson.