Þrettán slösuðust í sex umferðarslysum

Þrettán vegfarendur slösuðust í sex umferðarslysum á höfuðborgarsvæðinu í síðustu viku.

Í tilkynningu frá lögreglu segir að mánudaginn 17. nóvember klukkan 8.25 lenti hjólreiðarmaður, sem hjólað hafði reiðhjólastíg við Hverfisgötu til austurs, á bifreið, sem hafði verið ekið norður Barónsstíg og stöðvuð við gatnamótin. Hjólreiðamaðurinn var fluttur á slysadeild með sjúkrabifreið.

„Tvö umferðarslys voru tilkynnt þriðjudaginn 18. nóvember. Kl. 10.11 varð 12 ára drengur á reiðhjóli fyrir bifreið, sem ekið var austur Breiðholtsbraut að Norðurfelli. Drengurinn var að hjóla áleiðis yfir götuna á gangbraut, sennilega á móti rauðu ljósi. Hann meiddist á hné og fór á slysadeild til skoðunar,“ segir í tilkynningunni.

Klukkan 17.56 varð kona fyrir bifreið á bílastæðinu hjá Húsgagnahöllinni við Bíldshöfða. Mikið myrkur var er atvikið átti sér stað og léleg lýsing. Konan fór sjálf á slysadeild og segir að hún hafði fleyðrast á höku og marist.

Þrjú umferðarslys voru tilkynnt föstudaginn 21. nóvember. Klukkan 9.08 var strætisvagni ekið í gegnum grindverk. Strætisvagninum hafði verið ekið norður Flatahraun að gatnamótum Suðurhrauns þar sem vagninum var ekið á grindverkið, inn á athafnasvæði, og út af því aftur uns hann stöðvaðist á Miðhrauni. „Ökumaðurinn hafði „dottið út” þegar hann nálgaðist gatnamótin, en rankaði síðan við sér þegar hann var búinn að aka tvívegis í gegnum girðinguna og stöðvaði vagninn. Sjö farþegar voru í strætisvagninum. Þeir kvörtuðu yfir minniháttar meiðslum í baki og fótum og voru því ásamt bílstjóranum fluttir á slysadeild til skoðunar.“

Klukkan 17.15 hjólaði maður á steintyppi á Lækjartorgi og kastast fram fyrir sig. Hann var fluttur með sjúkrabifreið á slysadeild. „Og kl. 17.38 varð kona fyrir bifreið, sem bakkað var úr stæði við Krónuna í Vallakór. Konan féll við og var bifreiðinni þá ekið yfir rist hennar. Hún var flutt á á slysadeild með sjúkrabifreið.“