Fjórir gestir Park reyndust undir lögaldri

Skemmtistaðnum Park á Hverfisgötu var lokað í nótt vegna „veru ungmenna inni á staðnum“ eins og segir í skýrslu lögreglu. Þar segir einnig að ungmennin hefðu fengið afgreitt áfengi inni á staðnum, en eigandi Park segir það ekki satt.

„Þessir krakkar voru ekki að kaupa sér áfengi,“ segir Össur Hafþórsson, eigandi Park. „Þeir framvísuðu annarra manna skilríkjum og voru teknir inni á staðnum þannig.“

Að sögn Össurar voru ungmennin fjögur og reyndust vera sautján ára. Þau voru flutt á lögreglustöð og foreldrar þeirra látnir sækja þau. 

„Þau voru tekin burt og við lokuðum bara í framhaldi af því,“ segir Össur. „Þetta var allt gert í góðu samstarfi við lögregluna og svona.“

Park verður aftur opinn í kvöld.