Rúður skemmdar á húsum og bílum

Lögreglan á höfuðborgarsvæðinu virðist hafa haft í nógu að snúast í dag. Snemma í morgun var tilkynnt um rúðubrot í tveimur húsum við Njálsgötu og var einn maður handtekinn. Sá bíður eftir að af honum renni, svo hægt verði að yfirheyra hann.

Um hálf átta í morgun voru rúður brotnar í tveimur bílum við Asparlund, en ekki er vitað hver var þar að verki. Seinna í dag barst lögreglunni svo tilkynning um skemmdir á bifreið við Kleppsveg. Gerandinn var farinn af vettvangi þegar lögreglan kom, en vitað er hver hann er.

Þar að auki voru rúður brotnar í Bryggjuhverfinu í dag.

Einnig barst lögreglunni tilkynning um innbrot og þjófnað í Lækjarmelum, þar sem miklu magni af verkfærum var stolið. Málið er nú í rannsókn. Þá var einn ökumaður stöðvaður skömmu fyrir þrjú í dag grunaður um akstur undir áhrifum fíkniefna.