Tillögu VG um áheyrnarfulltrúa í nefndum hafnað

Vinstri hreyfingin grænt framboð mun ekki fá áheyrnarfulltrúa í tveimur nefndum Hafnarfjarðarbæjar. Tillaga þess efnis var lögð fram á fyrsta fundi bæjarstjórnar þann 18. júní en felld á fundi forsetanefndar 30. október síðastliðinn.

„Afgreiðsla málsins dróst svona lengi þar sem forsetanefndin var ekki fullmönnuð fyrr en á fundi 6. október. Við töldum eðlilegt að fulltrúar allra flokka tækju þátt í samtalinu um þetta mál og það útskýrir dráttinn,“ segir Guðlaug Kristjánsdóttir oddviti Bjartrar framtíðar og forseti bæjarstjórnar.

Guðlaug segir að til standi að gera úttekt á starfsemi nefnda og ráða og skoða málið heildstætt. „Áheyrnarfulltrúar hafi verið samþykktir í forsetanefnd, bæjarráð auk fleiri ráða og meirihlutinn gaf að auki eftir sæti á landsþingi Sambands sveitarfélaga svo allir flokkar ættu þar mann. Ákvörðun forsetanefndar endurspeglar afstöðu meirihlutans að svo stöddu í máli þessu.“

Nefndirnar sem um ræðir eru menningar- og ferðamálanefnd og íþrótta- og tómstundamálanefnd. Áður hafði verið samþykkt að Samfylkingin hlyti áheyrnarfulltrúa í forsetanefndinni auk þess að Vinstri grænir fengu áheyrnarfulltrúa í mörgum nefndum og ráðum bæjarins.

„Við höfum ekki fengið nein efnisleg rök fyrir synjuninni. Bón Framsóknarflokksins um áheyrnarfulltrúa var hafnað þar sem ekki var talin lagastoð fyrir því að veita þeim hann. Synjunin gagnvart okkur er hins vegar ekki rökstudd,“ sagði Guðrún Ágústa Guðmundsdóttir

Guðrún bendir einnig á að ekki fari nógu mikið fyrir samstöðunni sem talað var um eftir kosningar. Til hafi staðið að fá alla aðila að borðinu í öllum málum. Hins vegar það sé til að mynda stutt síðan að því var hafnað að fulltrúar allra flokka ættu sæti í starfshópi um skólastefnu bæjarins.

Guðrún fór fram að málinu yrði vísað til bæjarstjórnar til fullnaðarafgreiðslu. „Það hefur tíðkast að ef óeining er innan nefndar eða ráðs þá hefur málum verið vísað til bæjarstjórnar. Ég geri mér ekki vonir um að þau breyti um skoðun milli funda en það er mikilvægt að þetta mál verði rætt á bæjarstjórnarfundi.“