Dæmdur fyrir hrottafengna árás á sambýliskonu sína

Hæstiréttur staðfesti í dag dóm Héraðsdóms Reykjavíkur um þriggja mánaða skilorðsbundið fangelsi yfir karlmanni sem réðist á sambýliskonu sína á heimili þeirra í september 2011.  Við ákvörðun refsingarinnar var litið til þess að árásin var tilefnislaus og hrottafengin en samkvæmt úrskurði Hæstaréttar reyndi konan ítrekað að komast undan.

Þá var hann einnig fundinn sekur um að hafa haft í vörslu sinni heimabrugg, sem er brot gegn áfengislögum, ásamt því að hafa ekið undir áhrifum ávana- og fíkniefna.  Hann var sviptur ökurétti í átján mánuði og gert að greiða 160 þúsund króna sekt.

Leið sem hún væri að kafna

Manninum var gefið að sök að hafa slegið sambýliskonu sína, tekið höndum um háls hennar og sest klofvega ofan á brjóstkassa hennar með þeim afleiðingum að hún hlaut eymsli, marbletti, bólgur og sár víðsvegar um líkamann.  Konan lýsir því í dómi héraðsdóms að henni hafi fundist sem hún væri að kafna en hún hafi náð að slá sambýlismann sinn með grjóthnullungi í höfuðið. Við það hafi hún losnað úr greipum hans.

„Búinn að biðja hana endalaust fyrirgefningar“

Í skýrslutöku lögreglu neitaði maðurinn að hafa lagt hendur á konuna en þar kemur fram að hann hafi verið mjög ölvaður. Á enni hans voru áverkar sem blæddi úr.  Hann sagði fyrir dómi að hann og sambýliskona hans hafi slegist umræddan dag og vildi ekki rengja þá áverka sem lýst var í ákæru. Konan hafi fengið þá af hans völdum. Kvaðst hann: ,,iðrast allavega mjög mikið ... ég er búinn að biðja hana endalaust fyrirgefningar.“

Áfrýjaði dómur héraðsdóms var óraskaður. Manninum var gert að greiða allan sakarkostnað og yfirlit vegna áverkavottorðs ásamt málsvarnarlaun verjanda síns, alls 434.995 krónur.