"Löglegt en siðlaust“

Allsherjarverkfall félagsmanna í Starfsmannafélagi Kópavogs (SfK) hefst þann 10. nóvember ef samningar nást ekki. Vegna verkfallsins munu 38 starfsmenn bæjarins sem eru á fyrirframgreiddum launum aðeins fá útborgað nú um mánaðamótin fyrir dagana 1.-9. nóvember. Verði ekki verkfall munu þessir starfsmenn fá borgað það sem vantar upp á fyrir mánuðinn.

Bærinn vísar í reglur frá Sambandi íslenskra sveitarfélaga um frádrátt launa vegna vinnustöðvunar. Jófríður Hanna Sigfúsdóttir, formaður Starfsmannafélags Kópavogsbæjar, segir þetta kannski löglegt en siðlaust. Hún segir ekki hafa fengið þetta staðfest fyrr en í gær.

„Ég var búin að óska margoft eftir því að fá staðfestingu á þessu frá yfirmönnum því maður hafði heyrt þessu fleygt. Ég fékk síðan póst rétt fyrir klukkan17  í gær þar sem þetta var staðfest,“ segir Jófríður í samtali við Vísi.

„Mér finnst óskaplega sérkennilegt að það skuli vera tekin ákvörðun um að gera þetta með þessum hætti hér. Ég vísa til kennaraverkfallsins 2004 sem hófst þann 20. september. Þann 1. september lá fyrir að það yrði verkfall en starfsmenn á fyrirframgreiddum launum fengu engu að síður full laun. Það eru auðvitað 10 ár síðan og kannski er búið að breyta reglunum. Þetta er kannski löglegt en siðlaust.“

Deiluaðilar funduðu með ríkissáttasemjara í fyrradag í sitthvoru lagi. Sáttasemjari bar skilaboð á milli. Aðspurð hvort enn beri mikið í milli segir Jófríður:

„Já, það má segja það en ég hef trú á að samningar náist áður en verkfall skellur á. Ég bara trúi því ekki að starfsemi bæjarins verði látin lamast.“

Hún býst við að í dag verði næsti fundur í deilunni ákveðinn. Á mánudaginn er vika í að verkfallið eigi að hefjast svo deiluaðilar hafa einungis næstu viku til að ná samningum.

Um 800 manns eru í SfK. Á meðal þeirra sem munu fara í verkfall eru starfsmenn sundlauga, ófaglærðir starfsmenn og matráðar á leikskólum, starfsmenn í Dægradvöl í grunnskólum bæjarins, starfsmenn á velferðarsviði og bæjarskrifstofum, svo einhverjir séu nefndir. Það er því ljóst að verkfallið mun hafa víðtæk áhrif.

Að sögn Sigríðar Bjargar Tómasdóttur, upplýsingafulltrúa Kópavogsbæjar, er bærinn nú að skoða hvaða áhrif verkfallið muni hafa, komi til þess, á stofnanir bæjarins.